संरक्षणको प्राथमिकतामा पर्दैनन् साना स्तनधारी प्राणी

नवीन लुईटेल
काठमाडौं– जैविक विविधता कायम राख्न मद्धत गर्ने साना स्तनधारी प्राणी संरक्षण र खोज अनुसन्धानको हिसाबले कम प्राथमिकतामा पर्ने गरेको पाइएको छ।

जैविक विविधता कायम राख्न ठूलोसँगै साना स्तनधारी प्राणीको पनि उत्तिकै भूमिका रहने संरक्षणकर्मी बताउँछन्। तर, कुल १ सय प्रतिशतमा ६० प्रतिशत साना स्तनधारी प्राणी रहेपनि संरक्षणमा खासै प्राथमिकतामा नपरेको उनीहरूको भनाइ छ।

साना स्तनधारी प्राणी संरक्षण तथा अनुसन्धान फाउन्डेसनका अनुसार कुल ६० प्रतिशत साना स्तनधारीमध्ये ९ प्रतिशत खतराको सूचीमा रहेका छन् भने बाँकी ४३ प्रतिशत सामान्य अवस्थामा रहेका छन्। फाउन्डेसनका अनुसार विश्वव्यापी रुपमा १ देखि २ केजीसम्मका स्तनधारी प्राणीलाई साना स्तनधारी भनेतापनि नेपालमा ५ केजी सम्मका स्तनधारी जनावरलाई साना स्तनधारीमा राखिएको छ।

बाघ, भालु, चितुवा, गैंडा, हात्ती, अर्ना लगायत ठूला स्तनधारी प्राणीको तुलनामा साना स्तनधारी प्राणी प्राथमिकतामा नपर्नु दुखद पक्ष रहेको फाउण्डेसनकी अध्यक्ष तुलसी लक्ष्मी सुवाल बताउँछिन्। ‘ठूला जीवजन्तुको तुलनामा सानाको अध्ययन, अनुसन्धान भएको पाइँदैन,’ उनले भनिन्, ‘४८ प्रतिशत साना स्तनधारीको त तथ्यांक समेत छैन, जुन ढंगमा अध्ययन अनुसन्धान हुनुपर्ने हो त्यत्ति भएको पाइँदैन। ’

News source: http://www.hakahaki.org

Leave a Reply

Your email address will not be published. Required fields are marked *